Koran Musi, Palembang – Presiden SFC Hendri Zainuddin yang ngoloki YouTube terkenal Atta Halilintar untuk jadi pengurus Laskar Wong Kito, dinilai kareno dak pacak nyari sponsor untuk nyukupi biaya melok Liga 2 musim ini.
Ketua Umum Sriwijaya Mania (S-MAN) Edi Ismail sebenarnyo mendukung langkah Presiden SFC yang pengen nagajak bergabung Atta Halilintar, tapi dio jugo nyoroti kinerja manajemen yang dak pacak gandeng perusahaan besak yang ado di Sumsel untuk jadi sponsor.
“Sebenernyo boleh-boleh bae yang nak pecak ini. Tapi alangke sayangnyo klub level provinsi dak biso nyari sponsor untuk SFC. Sedangkan selamo ini biso-biso bae SFC dapat sponsor,” kato Edi Ismail.
Edi menyebut di Sumsel ini ado banyak perusahaan perkebunan, pertambangan dan perusahaan besak lainyo. Tapi ngapo manajemen pecak dak biso ngoloki biar jadi sponsor tim yang bermarkas di Jakabaring ini.
“Dak kan mungkin mereka dak ngasih ke SFC kalau sudah ado instruksi dari Pak Gubernur lewat manajemen untuk nyumbang SFC. Lagian SFC di Liga 2 dak kebesak igo biayanyo dibanding dengan Liga 1,” uji Edi.
Sebaliknyo, Edi menilai SFC dak pacak cuma ngarep dari penjualan marchandise dan lainnyo. “Kalu nak ngarep marchandise dan sebagainyo dak ke bakal tecari dengan dana semak itu,” katonyo.
Komentar